از اشعار لَکی قدیمی لک امیر

از اشعار لَکی قدیمی لک امیر
فلک حیله ساز
فلک چَت بوشم چَرخ چَپی گرد
چیوت بوشم و گرد لک امیر چت کرد
چیوت بلا ونم عروس صَدچی جا
عجوزه بدفرم بی شرم و حیا
کُهنه رقاصه مار خوش خط و خال
لکاته ی دهر پست روزگار
تا که کورپه ی بیم معصوم بی خَوَر
فریب منته میا وَ شیر مادر
وَ اوان طفلی من شوخ و شیدا
هنر تو یه بی آیلتی گوله مه یا
چیو دیو فسانه وَ پیم مَخَنیاین
وَ نامردیا دَس ویت مه شانیاین
حیله و فریب پیشه ویت کردی
وَ صد فَر و فَن ویت در مآوردی
مه ناشی نارَس کَم عقل و نایان
تو کهنه بیوه پند و هزار زان
وَ ظاهر وینه ی دوس گیان گیانی
وَ باطن کینه ت وَ پیم مرشانی
یتیمت کردم وَ نوجوانی
هَریت دامی سَر وَ زندگانی
وَ مرگ دالکم تیز و گز بریام
پلکیامه خاکا همیژ و رزیام
عُمرم چیه سَر هَر وَ داخ و دووی
وَختی هاتمو وژ جوانیم طی بووی
جوانیم طی بی پیر بیم و خاپیر
خمین دلهرده ای فلک دلگیر
روی سی ای مردم خجل اَژ اولاد
رنجم هَدَر چی چووی رَنج فرهاد
هَر چه ی گیانم کَن عمرم حساو کرد
هَر چی تاسم هایشت تاس من نه ورد
و دوویزان زنئی سَر مَرن چوویچیا
هَر چی دوویزم دا نوا ریم گیرا
فلک حیله ساز هَر حیله سازی
بدبختت کردم وَ دوویزان بازی
(خریوه_دیوان اشعار لکی لک امیر صفحه 36)