دنیای ئیمه‌ و ئیوه...کاوه‌ خوسره‌وی

دنیای ئیمه‌ و ئیوه
ئه‌ڕا مادیا و گشت مناڵه‌ نازاره‌گان

دنیای ئیوه‌ ڕه‌نگا و ڕه‌نگه،‌ وێنه‌ی سیمینه‌وزه‌ڕینه‌
دنیای ئیمه‌ لافاو ژانه، سه‌راپاێ ڕه‌نجیانه‌ و کینه‌
له‌ به‌ین خوه‌شی و ناخوه‌شی، ئیمه‌ مڵوزم خوه‌شیمن
ئیوه‌ فریشته‌‌ی خوه‌شبه‌ختین، دنیادان پڕ له‌ خه‌نینه‌
بازار ده‌رد ئیمه‌ گه‌رمه‌ و شه‌ڕ له‌لێ وارێ قسه‌مان
ژیان ئیوه‌ شاد و ساده،‌ جوان و زه‌ریف، مه‌خمه‌ڵینه‌
له‌ وڵات زه‌ین گه‌وره‌گان، دایم ها که‌مین دێو شه‌و
له‌ ئاسمان خه‌یاڵ ئیوه‌ به‌س، بریقه‌ی لیسک زه‌ڕینه
دیاری ئیمه‌ ئه‌ڕادان هه‌ر په‌ژاره‌ و خه‌م بێ پایان
ئومێد و خوه‌زیه‌ی ئیوه‌یش، دنیایک سانا و شیرینه‌

2012.06.22 کاوه‌ خوسره‌وی