یاد شاعر گەوراێ نەتەوەکەمان لە دڵمان زنگ میند. کاک ئەسەد چراخی یەکتک لە شاعێرە نەتەوەییەکان ملەتەکەمانە. بەش فرەیەگ لە شێعرەکانی، نەتەوەیی و شۆڕشگێڕانەس. ئەوەێ کە کاک ئەسەد و شێعرەکانێ لە بەشێک لە شاعرەکانترەک جیاوە کەێد، نەترسیان و وەتن شێعرە نەتەەیی و شۆڕشگێڕانەکەینە. خوەمان وە شەریک خەم کەس و کار و بنەماڵەی بەڕێز ئەسەد چراخی زانیم و یادێ لە دڵمانە وە زنگ میند.
ڕووژێ بمباران شیمایی حەڵەبجە تەوەست سەدام جنایەتکار بود، چمە تاقوەسان و وەگەرد کوچکێگا قسە کەم:
هویشێ: کوچک تو سەختی یا من یا ئاسن
گووش بکە قسەێ سەخت بەخت من
ئەر تو وێنەێ من سەختی بکیشی
هەر ساڵ وە ئەزاێ یاران بنیشی
جەشن نەوروزت واوەیلا و شین بوو
خوەشی وەهارت شینو گرین بوو
ماڵت بودە جاێ "مروەت بلاون"
قەزاوەت بکە! تو سەختی یا من؟
بێ یارو یاوەر گووشەێ شاران بی
بێ گونا ئەسیر گوناکاران بی
جەلد جەسوور بشکنێ باڵت
زاڵم ئاگردەێ خەێمەێ خەێاڵت
گرفتار دام ڕەنجو ماتەم بی
بێبەش وە خوەشی هردک عاڵەم بی
ئقباڵت چەفت بو جور چوو هەرجن
قەزاوەت بکە! تو سەختی یا من؟
وەلێد بگرن حەق ئازادی
ئادابو ڕسووم، شیوەنو شادی
وەخەێرو وەشەڕ کونترورت کەن
چەفت تماشاکەی، کوور کوورت کەن
وەهەر کوو بچی، بنشینە جەمت
قسەێ حەق بکەی، بێەنە ناو دەمت
ڕووژێ فریشتە، ڕووژێ بونە جن
قەزاوەت بکە! تو سەختی یا من؟
بەشەر وەدەرگاێ خاڵق یەکسانە
زەمین سفرەێ حەق، بەشەر مێوانە
یەکی خوەراکێ دم گاپیرە
یەکی خاویار عەسەڵ و شیرە
یەکی قاڕنشین سەرماێەدارە
یەکی کوورنشین، بێکار شارە
یەکی جوانە، بێ ماڵ و بێ ژن
کوچک تو سەختی، یا من یا ئاسن؟
هویشێ: وەلا برا تو، وەلا برا تو
هەڵبەتە لەێرا کوچک تەیید کەێ من سەختتر لە ئەوم، یانێ کورد سەختترە نە من.
Keine Kommentare:
Kommentar veröffentlichen